ويــــــــــــن آنــت؟

يكبر قسى جـرح السنيـن ويعنـي
رجل الحزين اللي على حـد الإدراك
هذا أنا يوم أخلـف الوقـت ظنـي
الحـزن حزنـي والسوايـا سوايـاك
بكيـت وأبكيـت العيـون وبكنـي
تعال شفني كل مـا حـان ذكـراك
كم واحدٍ جانـي بعـدك وسألنـي
شخبار من حبيت وأقفـى وخـلاك؟
وأصـد والحـزن الخفـي ممتحنـي
وأن قلت منهو قيل ماهـوب يخفـاك
قيل العوض قلت العوض ما شحنـي
والله لا هــــذا ولا ذا ولا ذاك
يا مـا بعضهـم مرنـي مـا فتنـي
يا جعل ماهم بالعـوض فـي محيـاك
الله لا يجبـر عـزا مـن عذلـنـي
ما جاه ما جاني ولا جاه مـا جـاك
واللي عذل ويقول (لو و لـو أنـي)
جعل يعشق له واحـدٍ كنـه إيـاك
ما فيـه شـيٍ فـي حياتـي غبنـي
الا نهار أقفيت وأنـا أسمـع إبكـاك
الله مـن جـرحٍ قـديـمٍ مكـنـي
أمداك نزفه لكن ادواه مـا أمـداك
عليّ كـم جـار الزمـان وطعنـي
أسمع صدى صوت المعاليـق تنخـاك
وين أنت ياللي كل ما غبـت كنـي
واقف على بـاب الأمـل وأتحـراك
ليتك تعـرف تخـون وأقـول خنـي
على الأقل القـى سبـب وأتنسـاك
وليت الزمن فمحبتـك مـا خذلنـي
وليت الهجر من طيب خاطرك ورضاك
لـو أن قربـك والوصـل بالتمنـي
ما غبت عن عيني كثـر مـا اتمنـاك
خايف يطول البعـد وتسـج منـي
وياخذ مكانك شخص ماهوب يسواك
وش عاد أسوي يومك أقفيـت عنـي
لا أنا أتبع المقفي ولا أحـب فرقـاك